İraqda Sədr Hərəkatı lideri Müqtəda əs-Sədr tərəfdarları Yüksək Seçki Komissarlığı üzvlərinin dəyişdirilməsi tələbiylə paytaxt Bağdadda aksiya təşkil edib.

"Euronews" xəbər verir ki, nümayişçilərin mühafizə edilən "Yaşıl Bölgə"-yə getmək istəmələrindən sonra gərginlik yaşanıb.

Aksiya iştirakçılarını dağıtmaq üçün havaya atəş açan polis gözyaşardıcı qazdan istifadə edib. Meydana gələn hadisələrdə 2-si polis 7 nəfər ölüb, ən az 200 nəfərin də yaralandığı bildirilir.

"Hökumət dəyişikliyi istəyirik. Bunların yerinə ölkəsini sevən insanların gəlməsini və İraqı yenidən inşa etməsini istəyirik. Seçkilər manipulyasiya edildi. Hər 4 ildə bir eyni korlanmış insanlar seçilir. Daha dürüst insanları istəyirik".

Parlament və hökumət içindəki korrupsiyanı etiraz edən nümayişçilər Yüksək Seçki Komissarlığı qanunu və üzvlərinin dəyişdirilməsini tələb edib.

Müqtəda əs-Sədr, sabiq baş nazir Nuri əl-Maliki dövründə təyin olunmuş Seçki Komissarlığı üzvlərinin partiyalara yaxınlıqları səbəbiylə müstəqil olmadıqlarını müdafiə edir.

Xatırladaq ki, Sədr tərəfdarları keçən il təşkil etdikləri nümayişdə "Yaşıl Bölgə"-yə girə bilmişdi.