İnzibati qaydada həbs edilmiş hüquqşünas Emin Aslanın müdafiəçiləri apellyasiya şikayəti verib.
Bu barədə «Turan» agentliyinə onun yaxınları bildiriblər.
Məlumata görə, Nərimanov Rayon Məhkəməsinin hüquqşünas barədə çıxardığı qərar onun yaxınlarına təqdim edilib. Qərardan 10 gün müddətində şikayət verilə bilər.
Vəkillər artıq rayon məhkəməsinin qərarının dəyişdirilməsi istəyi ilə Bakı Apellyasiya Məhkəməsinə şikayət göndərib.
İnzibati prosessual qanunvericiliyə görə, inzibati pozuntularda həbs tədbiri seçilibsə, apellyasiya şikayətinə dərhal baxılmalıdır.
İyunun 4-də saxlanan hüquqşünas E.Aslan inzibati qaydada həbs edilib.
İnzibati Xətalar Məcəlləsinin 535.1-ci (polisin qanuni tələbinə tabe olmama) maddəsi ilə günahlandırılan E.Aslana Nərimanov Rayon Məhkəməsi 30 sutka inzibati həbs verib.
Onun məhkəməsinin vəkilinin iştirakı olmadan keçirildiyi bildirilir.