Gürcüstanda dollarla krediti olan bu krediti lariyə çevirə bilər. Özü də aşağı məzənnə ilə. Gürcüstan hökuməti Milli Bankla birlikdə “lariləşmə planı” hazırlayıb.

Bu barədə RadioAzadlıq Gruziya Online-a istinadən xəbər verir. Baş nazir Gioirgi Kvirikashvili deyib ki, “2015-ci il yanvarın 1-nə kimi dollarla kredit götürənlər həmin krediti dollardan lariyə çevirə bilərlər. Krediti lariyə çevirəndə cari məzənnədən 0,2 aşağı məzənnə götürüləcək. Məsələn, 1 dollar 2,50 laridirsə, onda krediti 1 dollar – 2,30 məzənnəsi ilə çevirəcəklər.”

Baş nazir deyib ki, bu, birdəfəlik sosial aksiyadır, köməkdir.

Buna da baxın: Tarif Şurası işığın və qazın qiymətlərini qaldırdı

Dollar kreditini lariyə çevirməyə bir şərt qoyulur. Dollarla krediti götürən fiziki şəxsdirsə və krediti götürəndə əmlakını girov qoyubsa, onda o, dollarla krediti lariyə çevirə bilər.

Hökumətin bu addımı borclu olanlara böyük köməkdir. Ancaq Exo Kavkaza yazır ki, hökumət buna getməsə, Gürcüstanın maliyyə-bank sistemi təhlükə altına düşə bilər.

Gürcüstanda dollarla kredit götürənlər ildə 500 milyon lari, yəni təxminən 200 milyon dollar faiz ödəyirdilər. Lari düşməyə başlayandan və gəlib 1 dollara 2,51 lari həddinə çatandan bu illik faiz 800 milyona qalxıb.

Buna da baxın: Ermənistanda qazın qiymətini salıblar 

Exo Kavkaza yazır ki, mütəxəssislər hələ xeyli əvvəl deyirdilər ki, 1 dollar 2,60 lariyə çatsa, onda adamlar artıq dollarla götürdükləri kreditlərə görə ödəniş etmək qabiliyyətlərini tamamailə itirəcəklər.

“Cəmiyyət və Banklar” təşkilatının sədri Georgi Kepuladze deyir ki, hakimiyyət bankları məcbur etmək istəyir ki, daha dollarla kredit verməsinlər, yalnız lari ilə versinlər.

Kepuladze xatırladır ki, “belə təcrübəni Argentinada gördük, ağır nəticələrə gətirdi”. Onun sözlərinə görə, “İsrail və Polşa təcrübələri daha yaxşıdır. Bu ölkələr 10-15 il ardıcıl siyasət yeridərək, dolların təsirindən yaxa qurtardılar.”

Buna da baxın: “Əslində xalqa qaz pulsuz verilməlidi” – [Video]

Kepuladze deyir ki, əgər hökumət larini gücləndirmək istəyirsə, velosiped ixtira etmək lazım deyil – inflyasiyanı aşağı saxlayıb, yüksək iqtisadi artımı təmin etməlidir.

Gürcüstanın baş nazirinin verdiyi məlumata görə, bankların verdiyi kreditlərin 63 faizi dollarla verilən kreditlərdir. Əhalinin banklardakı depozitlərinin isə 70 faizi dollarladır.