Gürcüstanda parlament seçkilərində səsvermə başa çatıb. AzadlıqRadiosunun gürcü xidməti yazır ki, 3.5 milyondan çox seçici parlamentə 150 deputatı seçib. 

3645 seçki məntəqəsində səhər 08.00-da başlayan səsvermə 20.00-da başa çatıb. Artıq bir saatdır ki, seçki məntəqələri bağlanıb. İndi səslərin sayılması gedir.

Gürcüstanda parlament seçkiləri ilə əlaqədar keçirilən “exit-pol”ların nəticələri açıqlanıb.vİlkin ekzitpolların nəticələrinə görə yeni çağırış parlamentə proporsional sistem üzrə üç partiya keçir: "Gürcü arzusu", "Milli hərəkat" və ruspərəst "Vətənpərvərlər alyansı".

Bu partiyalar 5%-lik baryeri keçirlər. Bununla belə müxtəlif sorğuların nəticələri bir-birindən fərqlənir. "İctimai yayımçı", "İmedi" və "Maestro" telekanallarının sifarişi ilə TNS şirkətinin keçirdiyi sorğuya əsasən hakim "Gürcü arzusu" 53,8%-lə öndədir. Saakaşvilinin "Milli hərəkatı" 19,5%-lə ikinci, "Vətənpərvərlər alyansı" isə 5%-lə üçüncü yerdədir.

"Rustavi 2" kanalının sifarişi ilə GFK şirkətinin keçirdiyi sorğuda isə "Gürcü arzusu" 39,9%, "Milli hərəkat" 32,74%, "Vətənpərvərlər alyansı" isə 5,76% səs yığıb.

Qeyd edək ki, “Exit-pol” 220 məntəqədə 10 min seçici arasında keçirilib.