İşgəncədə günahlandırılan BƏƏ generalı İnterpolun prezidenti seçilib

İşgəncələrə nəzarət etməkdə ittiham olunan Birləşmiş Ərəb Əmirliyi generalı Əhməd Əl-Rəisi İnterpolun prezidenti seçilib. Bu barədə cümə axşamı beynəlxalq polis təşkilatı məlumat yayıb.

Birləşmiş Ərəb Əmirliklərinin Daxili İşlər Nazirliyinin baş müfəttişi, general-mayor Əhməd Nasir Əl-Rəisi bundan əvvəl İnterpolun icraiyyə komitəsinin üzvü olub.

Əl-Rəisinin adı Əmirlik dissidenti Əhməd Mansur və 2018-ci ildə casusluqda ittiham olunaraq ömürlük həbs cəzasına məhkum edilən britaniyalı akademik Maykl Heges də daxil olmaqla, yüksək rütbəli siyasi məhbuslara evdə işgəncə verilməsi məsələsində hallanır. Heges daha sonra əfv olunub, lakin Mansur hələ də həbsdədir.

Onun barəsində beş ölkədə, o cümlədən İnterpolun baş qərargahının yerləşdiyi Fransada və seçkinin keçirildiyi Türkiyədə cinayət işi qaldırılıb.

Tənqidçilər onun narkotik qaçaqmalçılarını, insan alverçilərini, müharibə cinayətlərində şübhəli bilinənləri və ehtimal olunan ekstremistləri ovlamaq əvəzinə, mühacirətdə olan dissidentləri və hətta siyasi opponentləri tutmaq üçün İnterpolun qlobal imkanlarından istifadə edə biləcəyindən ehtiyat edirlər.

Əl-Rəisinin namizədliyi Avropada etirazlara səbəb olub. Fransa qanunvericiləri məsələyə müdaxilə etmək üçün birbaşa prezident Emmanuel Makrona müraciət ediblər. Alman deputatlar onun namizədliyinin Ümumdünya İnsan Hüquqları Bəyannaməsinə zidd olduğunu iddia ediblər. Əl-Rəisi deyir ki, o, dörd illik səlahiyyət müddətindən İnterpolu modernləşdirmək üçün istifadə etmək istəyir.

Böyük Britaniyanın dövlət ittihamları üzrə keçmiş direktoru ser Devid Kalvert-Smitin son hesabatına görə, BƏƏ Əl-Rəisinin namizədliyi üçün İnterpol daxilində nüfuz əldə etməyə cəhddə ittiham olunur.

2017-ci ildə BƏƏ İnterpolun Cenevrədə mərkəzləşmiş qeyri-kommersiya təşkilatı vasitəsilə Təhlükəsiz Dünya Fonduna 50 milyon avro ianə edib. Kalvert-Smit şirkəti “BƏƏ hökumətindən İnterpola nağd pul köçürmək üçün kanal” kimi təsvir edib.

Qurumun ilk Çin prezidenti Men Hunvey 2018-ci ildə Çinə qayıdarkən səlahiyyət müddətinin ortasında yoxa çıxdıqdan sonra prezident seçkiləri diqqətlə izlənilir.

Sonradan onun rüşvətxorluqda və digər iddia edilən cinayətlərdə ittiham edilərək saxlanıldığı məlum olub. Daha sonra İnterpol Menin prezidentlikdən istefa verdiyini açıqlayıb.

Cənubi Koreyalı vitse-prezident Kim Çen Yan Menin müddətinin qalan hissəsini yerinə yetirmək üçün tez bir zamanda əvəzedici seçilib.

Kimin prezidentliyi 2020-ci ildə başa çatmalı idi, lakin koronavirus pandemiyası İnterpolun keçən il illik toplantısını ləğv etməyə sövq etdikdən sonra onun səlahiyyət müddəti bir il uzadılıb.

Əvvəlki məqaləProkurorluq sərhəddə baş verənlərdən yazan 4 nəfərlə bağlı araşdırmaya başlayıb
Növbəti məqalədə15 ildən sonra azadlığa çıxan Qazax şairi və dissidenti Aron Atabek koronavirusdan vəfat edib