“Neftçi”nin futbolçusuna Qvineyadan çıxması ilə bağlı zəmanət verilib

“Hazırda narahatlığa əsas yoxdur”

Bunu Qvineya millisinin baş məşqçisi Didye Siks ölkədən çıxa bilməyən futbolçular haqqında danışarkən deyib.

67 yaşlı fransalı mütəxəssis legioner həyatı yaşayan oyunçuların Qvineyanı tərk etməsi üçün çalışdıqlarını bildirib: “Futbolçuların oynadıqları klublara qayıtmaları üçün səy göstəririk. Əminəm ki, problem dərhal həll olunacaq”.

Bundan əlavə, federasiya prezidenti Mamadu Antonio Souare oyunçularla görüşüb və onlara çıxış etdikləri ölkələrə sağ-salamat qayıdacaqlarına dair zəmanət verib.

“Neftçi”nin futbolçusu Mamadu Kane də hərbi çeviriləşə görə ölkəni tərk edə bilmir. 24 yaşlı yarımmüdafiəçi Mərakeş yığması ilə DÇ-2022-nin seçmə oyununa görə Afrikaya yollanıb. Sentyabrın 6-da keçirilməli olan Qvineya – Mərakeş görüşü FIFA-nın qərarı ilə təxirə salınıb. Bir həftə ərzində ölkəyə bütün giriş-çıxışlar dayandırılıb.

Müqavilə ilə Yunanıstan “Olimpiakos”una məxsus olan Mamadu Kane icarə əsasında “ağ-qaralar”da çıxış edir.

Əvvəlki məqaləAzərbaycanda 16-18 yaşlı yeniyetmələrin vaksinasiyası başlanır
Növbəti məqalədəYeniyetmələrin vaksinasiyası Bakı Sağlamlıq Mərkəzində aparılacaq