Qalmaqallı "Toplan" heyvan sığınacağına daha bir beş min itlik mərkəz tikilir

Qalmaqallı "Toplan" heyvan sığınacağına daha bir beş min itlik mərkəz tikilir
9 Sentyabr 2019
Mətni dəyiş

Bakı şəhərindəki sahibsiz itlərlə bağlı həyata keçirilən layihənin davamı olaraq yeni it sığınacağı yaradılacaq.

Bu barədə mərkəz açıqlama yayıb. Məlumatda deyilir ki, Abşeron rayonu Pirəkəşkül qəsəbəsində 5 min it yerlik olacaq bu sığınacaqda “Toplan” sahibsiz itlərə Qayğı Mərkəzi tərəfindən küçələrdən toplanan və mərkəzdə müəyyən tibbi prosedurlardan keçən itlər məskunlaşacaq.

Yeni sığınacaq sahibsiz itlərin məskunlaşma yeri olmaqla yanaşı, həmçinin onların baytar, qida və yaşayış üçün digər zəruri qayğı ilə əhatələndiyi məkan olacaq.

Pirəkəşkül qəsəbəsindəki sığınacağın 2020-ci ildə istifadəyə verilməsi nəzərdə tutulur.

Məlumata görə, “Toplan” sahibsiz itlərə Qayğı Mərkəzi fərdi şəxslər tərəfindən yaradılan sığınacaqlara dəstək göstərilməsi istiqamətində daha bir layihəni başa çatdırmaq üzrədir.

"Belə ki, Sabunçu rayonu, Bakıxanov qəsəbəsindəki park ərazisində olan it sığınacağının müraciəti əsasında “Toplan” Mərkəzi onların mövcud şəraitinin yaxşılaşdırılması işlərini həyata keçirib. Müraciət əsasında “Toplan” sahibsiz itlərə Qayğı Mərkəzi tərəfindən itlər üçün yeni ünvanda müasir tələblərə cavab verən sığınacaq inşa olunub".

Açıqlamada deyilir ki, sentyabr ayında istifadəyə veriləcək yeni sığınacaqda it qəfəsləri, su, kanalizasiya və işıqlandırma sistemi qurulub.

Qeyd edək ki, bundan öncə "Toplan" sahibsiz itlərə qayğı mərkəzinin əməkdaşlarının küçə itlərinə qarşı amansız davranışları heyvansevərlərin etirazına səbəb olub.

Bu il ərzində heyvansevərlər dəfələrlə "Toplan" it sığınacağının önündə etiraz piketləri keçiriblər.

Bənzər Xəbərlər

Yeniliklərdən xəbərdar olmaq üçün abunə olun