Polisin qanuni əmrinə tabe olmamaq ittihamı ilə ReAL partiyasının daha bir üzvü, Ərəstun Əlizadə Yasamal rayon məhkəməsinin qərarı ilə 30 sutkalıq həbs edilib. 

***

Mayın 30-da REAL Partiyasının fəalı Elmir Həmzə məhkəmənin qərarı ilə polisin qanuni tələbinə tabe olmamaq ittihamı ilə 25 sutka həbsə məhkum edilib.

Bu barədə Turan-a REAL Partiyasının Məclis üzvü Natiq Cəfərli bildirib.

Həmçinin Nəsimi Rayon Məhkəməsi mayın 30-da ReAL partiyasının üzvü Nəriman Mücahid İsmayıl haqda inzibati hökm çıxarıb.

O, İnzibati Xətalar Məcəlləsinin 535-ci maddəsi ilə ittiham olunaraq 30 sutka azadlıqdan məhrum edilib.

Partiyanın daha bir fəalı Ərəstun Baxşəliyev hazırda Yasamal Rayon Polis İdarəsinin 26-cı polis bölməsinə aparılıb. Pattiyanın daha iki fəalı da polisə çağırılıb.

REAL Partiyasının Məclis üzvü Azər Qasımlı mayın 29-da polisin qanuni tələbinə tabe olmamaq ittihamı ilə Yasamal Rayon Məhkəməsi tərəfindən 30 sutka inzibati qaydada həbs edilib.

Fəalların həbsi REAL Partiyası fəallarının mayın 28-də Azərbaycan Xalq Cümhuriyyətinin 100 illik yubileyi ilə bağlı istiqlaliyyət küçəsindəki abidənin önündə nümayiş keçirdikdən sonraya təsadüf edir.