NİDA Vətəndaş Hərəkatının həbsdə olan üzvü Elgiz Qəhrəmanın məhkəməsinin vaxtı bəlli olub.

Abzas.net xəbər verir ki, bu barədə vəkil Fariz Namazlı məlumat verib.

Elgiz Qəhrəmanın növbəti məhkəməsi noyabrın 29-u saat 15:00-da Ali Məhkəmədə olacaq.

Nidaçının işinə hakim Hafiz Nəsibov baxacaq.

Xatırlatma

Elgiz Qəhrəman ötən il avqustun 12-də saxlanıb və həmin gün onun haqqında CM-in 234.4.3-cü (külli miqdarda narkotik maddənin qanunsuz dövriyyəsi) maddəsi ilə həbs-qətimkan tədbiri seçilib.

Siyasi məhbus bir həftə Daxili İşlər Nazirliyi Baş Mütəşəkkil Cinayətkarlıqla Mübarizə İdarəsində saxlanılıb. Həmin müddətdə vəkili yanına buraxılmayıb.

E.Qəhrəman yanvarın 16-da Bakı Ağır Cinayətlər Məhkəməsinin hökmü ilə 5 il 6 ay azadlıqdan məhrum edilib.

Fəalın həm özü, həm də üzvü olduğu NİDA Vətəndaş Hərəkatı həbsin siyasi motivli olduğunu bildirib.

Beynəlxalq Hüquq müdafiəçiləri onu siyasi məhbus kimi tanıyıblar.