Mehman Əliyev təcridxanada 5 saata yaxın dindirilib

Mehman Əliyev təcridxanada 5 saata yaxın dindirilib
6 Sentyabr 2017
Mətni dəyiş

Abzas.net xəbər verir ki, bu barədə vəkil Fuad Ağayev məlumat verib.

Vəkil istintaqın müstəqil şəkildə aparılmadığını və buna görə də heç bir müsbət qərar gözləmədiyini bildirib:

"Ümumiyyətlə, barəsində ibtidai araşdırma aparılan cinayət işinin başlanmasının özü qanunsuzluqdur, istintaqdan hazırda hər hansı müsbət qərar gözləmirəm. İstintaq qeyri-müstəqildir. Hesab etmirəm ki, bu cinayət işini müstəqil şəraitdə başlayıblar və müstəqil şəkildə də ona xitam verəcəklər. Yəqin ki, dövlət başçısından burada bir iradə nümayişini gözləyirlər."

Sonda vəkil Mehman Əliyevin səhhətində problem olmadığını qeyd edib.

XATIRLATMA

Avqustun 25-i Yasamal Rayon Məhkəməsinin qərarı ilə “Turan” İnformasiya Agentliyinin direktoru M.Əliyev haqqında noyabrın 7-nə kimi həbs-qətimkan tədbiri seçilib. Ona Cinayət Məcəlləsinin 213.1 (vergi ödənişindən yayınma), 308.1 (vəzifə səlahiyyətlərindən sui-istifadə) və 192.2 (qanunsuz sahibkarlıq) maddələri ilə ittiham irəli sürülüb. Bundan bir gün əvvəlisə o, artıq şübhəli şəxs qismində saxlanmışdı.

Vergilər Nazirliyi avqustun 8-də “Turan” agentliyinin fəaliyyətinin səyyar vergi yoxlamasına başlayıb. Nazirlik iddia edir ki, 60 min manat vergidən yayındırılıb. M.Əliyev ittihamları qəbul etmir.

Avqustun 17-də də agentlikdən son 7 ilin sənədlərinin istənildiyi bildirilib. Üstəlik, agentliyin bütün bank hesabları dondurulub.

“Turan” İnformasiya Agentliyinin kollektivi bəyan edib ki, sentyabrın 1-dən fəaliyyətlərini qeyri-müəyyən bir vaxta kimi dayandırmaq məcburiyyətindədirlər.

Avqustun 28-də isə “Turan” İnformasiya Agentliyinin (İA) əməkdaşları Vergilər Nazirliyinin Vergi Cinayətləri İdarəsinə çağırılıblar. Verilən məlumata görə, əməkdaşlar “Turan” İA-ya qaldırılan cinayət işi ilə bağlı şahid qismində dindiriliblər.

Axşam saatlarında isə Vergi Cinayətləri İdarəsinin əməkdaşları agentliyin redaksiyasına gəlib. Onlara agentliyin əməkdaşlarının və vəkil Fuad Ağayevin iştirakı ilə “Turan” İA-nın son bir neçə illik maliyyə sənədləri təqdim edilib.

Bənzər Xəbərlər

Yeniliklərdən xəbərdar olmaq üçün abunə olun