Avropa Şurası Parlament Assambleyasının (AŞPA) Monitorinq Komitəsi Azərbaycandakı vəziyyətlə bağlı açıqlama yayıb.

Açıqlamada Azərbaycan hakimiyyətilə davam edən dialoq bəyənilib. Bunula belə bir sıra ləngimələr, məhkəmə sisteminin funksiyası və ifadə azadlığı ilə bağlı narahatlıqlar ifadə edilib.

Azadlıq Radiosunun məlumatına görə, açıqlama Komitənin sentyabrın 7-də Parisdə başa çatan iclasından sonra yayılıb. AŞPA Monitorinq Komitəsində müzakirələrə sentyabrın 4-də başlanmışdı.

Komitə xüsusilə təəssüf edir ki, bir il öncə baş vermiş konstitusiya dəyişiklikləri icra hakimiyyətinin parlamentə daha az hesabat verməsinə imkan yaradır.

Cinayət siyasətinin humanistləşdirilməsi reallaşdırılsın

Eyni zamanda, parlamentarilər cinayət siyasətinin humanistləşdirilməsi ilə bağlı prezidentin sərəncamını bəyənərək hakimiyyəti bu islahatı reallaşdırmağa dəvət ediblər.

Açıqlamada vurğulanır ki, Azərbaycanla bağlı həmməruzəçilər Stefan Schennach (Avstriya) və Cezar Preda-nın (Rumıniya) məruzəsi qəbul olunub.

Komitə Azərbaycan hökumətinin 2012-2014-cü illərdə irimiqyaslı “pul yumaq” sxemində iştirakı və xüsusilə, bunun Azərbaycanda insan haqları ilə bağlı AŞPA əməkdşalarının işinə təsir etməsi kimi iddiaların narahatlıq doğurduğunu ifadə edib.

"3 milyard" araşdırması ilə bağlı beynəlxalq qurumlarla əməkdaşlıq edilsin

Azərbaycan hakimiyyətini bu hallarla bağlı təcili olaraq müstəqil və tərəfsiz təhqiqat aparmağa, bu məslə üzrə kompitent beynəxlaq qurumlarla tam şəkildə əməkdşalığa çağırıblar.

Komitə habelə, QHT lideləri, hüquq müdafiəçiləri, siyasi fəallar, jurnalistlər, bloqqer və vəkillərin təqib edilməsindən narahatlıq ifadə edib:

“2016-2017-ci illərdə bəzi məhbuslarının azad olunmalarını dəstəkləyirik. Amma saxlanmaları əsaslı şübhə doğuran məhbusları da azad etməyə səsləyirik ”, - açıqlamada vurğulanır.

Avropa Məhkəməsinin qərarları tam icra olunsun

Komitə həmçinin, parlamentdən kənar müxalifətin fəaliyyətinə və sərbəst toplaşma azadlığına məhdudlaşdırıcı mühit yaradılmasından da narahat olduğunu bildirib.

Qurum yekunda Azərbaycan hökumətini Avropa İnsan Hüquqları Məhkəməsin qərarlarını tam şəkildə yerinə yetirməyi təmin etməyə, icra hakimiyyəti üzərində parlament nəzarətini gücləndirməyə, məhkəmə orqanlarının müstəqilliyini tam təmin etməyə səsləyib.

Bundan ötrü prokurorluq və məhkəmə sistemində islahatlar aparmağ təklif edilib.

Jurnalistlərə, QHT-lərə fəaliyyət üçün imkan verilsin

Hökumət eyni zamanda, jurnalistlərə və QHT-lərə basqısız şəraitdə fəliyyət göstərməyə imkan tanımağa dəvət edilib.

Məruzənin AŞPA-nın payız sessiyasında müzakirəyə çıxarılması nəzərdə tutulur. AŞPA həmməruzəçiləri isə sentyabrın 13-dən 17-nə kimi bu sənədin müzakirəsindən ötrü Azərbaycana gəlməlidirlər.

AŞPA-dakı müzakirələrdən yenicə qayıdan Azərbaycan nümayəndə heyətinin rəhbəri Səməd Seyidov da məruzə və həmməruzəçilərin səfəri ilə bağlı Azadlıq Radiosuna qısa münasibətini bildirib:

Səməd Seyidov: "Biz də bunu faktiki qəbul edirik"

“Bu məruzəni Azərbaycanda rəsmilərlə müzakirə etməyə, dialoq əsasında konstruktiv irəliləyiş görməyə gəlirlər. Biz də bunu faktiki qəbul edirik. Baxmayaraq ki, məruzə çox tənqidi məqamları ehtiva edir, biz deyirik:

“Gəlin, bir də oturaq söhbət edək, görək harda düzdür, harda əyridir, nəyi düzəltmək mümkündür?” Biz konstruktiv dialoqdan əl çəkmirik. Baxmayaraq ki, sənəddə tənqid, hətta bəzi məqamda təhqir və təzyiq də əksini tapır”, - deyə, Səməd Seyidov vurğulayıb

Azərbaycan 2001-ci ildən Avropa Şurasının üzvüdür. Bu quruma üzv olarkən Azərbaycan insan haqları, azad seçkilər, Qarabağ münaqişəsinin sülh yolu ilə həlli və daha bir çox məsələlərlə bağlı üzərinə öhdəlik götürüb. Azərbaycan, hələ də qurumun monitorinqi altındadır.