“Biz öhdəmizə götürdüyümüz hər bir məsələyə çox məsuliyyətlə yanaşırıq. Azərbaycanın maraqlarını, beynəlxalq imicini üstün tutaraq, ölkəmiz və xalqımız üçün layiqli nailiyyətlər əldə etməyə çalışırıq”.

Bu gün, aprelin 21-i IV İslam Həmrəyliyi Oyunları Təşkilat Komitəsinin yekun iclasındakı çıxışında komitənin sədri, birinci vitse-prezident Mehriban Əliyeva belə deyib.

AZƏRTAC-ın xəbərinə görə, o, vurğulayıb ki, Azərbaycan bütün müsəlman ölkələri ilə əlaqələrini dostluq, qardaşlıq, qarşılıqlı hörmət əsasında qurur.

Birinci vitse-prezident deyib ki, Azərbaycan bütün dünyada idman məkanı kimi tanınır.

“Bu günə qədər oyunların uğurla keçirilməsi üçün bir çox tədbirlər görülüb. Ümumiyyətlə, demək olar ki, şəhərimiz oyunların açılışına hazırdır”, – M.Əliyeva bildirib.

O, söyləyib ki, oyunlar zamanı nəqliyyat sisteminin koordinasiyası vacib məsələlərdəndir. Şəhər sakinlərinin rahat hərəkət etməsi təmin edilməlidir.

IV İslam Həmrəyliyi Oyunları mayın 12-dən 22-nə kimi davam edəcək. 20 idman növü üzrə keçiriləcək yarışlara dünyanın 50-dən çox müsəlman ölkəsindən 3 minə yaxın idmançının qatılacağı gözlənir.