Nardaran hadisələrinə görə həbs olunmuş "Müsəlman Birliyi" Hərəkatının üzvü Abbas Hüseyn Bakı İstintaq Təcridxanasından hüquq müdafiəçilərinə və beynalxalq təşkilatlara müraciət ünvanlayıb.

"Təcridxanada məhbuslara işgəncə verilir"

Yaxınlarının Meydan TV-yə təqdim etdiyi müraciətdə deyilir:

"Əziz hüquq müdafiəçiləri və ictimaiyyət nümayədələri!

Bilirsiz ki, illərdir Azərbaycan hakimiyyəti öz xalqına qarşı fiziki və mənəvi terror törətməkdədir. Haqq sözü deyənləri şər-böhtanlarla zindanlara salır və işgəncələrə məruz qoyurlar. Biz əzəl gündən vətənimizdə hər kəsin firəvan yaşaması üçün əlimizdən gələni etmişik. Daim məzlumların yanında, zalımların önündə olmuşuq. Mən aprel ayının 5-də Bakı İstintaq Təcridaxanasında qanunsuz olaraq karsa salınmışdım. Karsda məndən başqa bir neçə nəfər də var idi. Onlara təcridxananın işçiləri amansız davranır, əl-qollarını bağlayıb işgəncələr verir və pis söyüşlərlə təhqir edirdilər. Biz zülmkarlara etiraz etdiyimiz üçün zindana salındıq və öz etirazımızı da edirik. Və burdan hər kəsə-xüsusən də hüquq müdafiəçilərinə və media nümayəndələrinə səslənirəm ki, bu məsələ ilə bağlı addım atsınlar, öz təsiredici mexanizmlərini işə salsınlar".

Ombudsman Aparatından Meydan TV-yə bildiriblər ki, onlara ünvanlanmış bütün müraciətlərə baxılır və mütəmadi olaraq həbsxanalara baş çəkilir. Əgər hər hansı şikayət olarsa, araşdırılacaq.

A. Hüseynov Bakı Ağır Cinayətlər Məhkəməsinin hökmü ilə 20 il müddətinə azadlıqdan məhrum edilib.