"Dünən (fevralın 15-də - red.) "Azəriqaz" elan etdi ki, fevralın 16-da Salyanda, Sabirabadda, İmişlidə qaz olmayacaq. Amma bu gün yuxudan oyananda gördük ki, bizim də qazımız kəsilib".

Bunu AzadlıqRadiosuna Bakı şəhəri, Məhəmmədi qəsəbəsinin sakini İntiqam Hacıyev deyir.

Bakının daha bir neçə qəsəbəsindən - Kürdəxanı, Maştağa, Zabrat, Sabunçu və Keşlədən də eyni şikayətlər gəlir. Qarlı və şaxtalı bir gündə bir çox əraziyə qaz verilişinin dayandırılması paytaxt sakinlərini qəzəbləndirib.

Fevralın 16-da səhər saatlarında Keşlə qəsəbəsinə də qaz verilişi dayandırılıb. Sakinlər səbəbini dəqiqləşdirməyə çalışsalar da, ətraflı məlumat ala bilmirlər.

«Qar yağmağa başlayan kimi, qazı da kəsirlər. İki-üç gün idi hava xoş keçirdi, qaz da vardı», - bunu deyən qəsəbə sakini Solmaz Rəhimova səhər açılandan qaz idarəsinə və qəza xidmətinə durmadan zəng vurur. O, qaz verilişinin hansı səbəbdən dayandırıldığını və bu vəziyyətin hələ nə qədər davam edəcəyini öyrənməyə çalışır.

Maştağa sakini Atamoğlan Allahverdiyev deyir, səhər saatlarından qəza xidmətinə zəng vursa da, cavab verən yoxdur: "Soyuqda qalmışıq. Bir tərəfdən də qar yağır".

Nəsimi və Nizami rayonları qaz idarələrindən AzadlıqRadiosuna bildirilib ki, qaz verilişindəki problem qaz borularında təmir işləri ilə əlaqəlidir. Tezliklə qaz verilişi bərpa olunacaq. "Azəriqaz" ASC-dən, hələlik, məsələyə münasibət öyrənmək mümkün olmayıb.