16 Fevral 2017
Mətni dəyiş
Şimali Kipr Türk Respublikasının prezidenti Mustafa Akıncı, Kipr müzakirələri çərçivəsində keçirilən liderlər görüşündə Cənubi Kipr Respublikasının başçısı Nikos Anastasiadis-in hirslənərək, "Söyləyəcək bir şeyim yoxdur" dediyini və qapını sərt şəkildə çırparaq, getdiyini söyləyib. Akıncı, "Onlar getdikləri üçün qapını yenidən açmaq öz əllərindədir", - deyə bildirib.
Abzas.net xəbər verir ki, Akıncı, Anastasiadis-lə Kipr probleminə həll yolu tapmaq üçün Birləşmiş Millətlər Təşkilatının (BMT) dəstəyi ilə geniş müzakirələr aparmaq üçün təxminən 1 saatlıq görüş keçirib.
Prezident Akıncı görüşdən sonra mətbuat mənsublarına verdiyi açıqlamada, "Anastasiadis sözünü dedikdən sonra BMT-nin Kipr üzrə xüsusi müşaviri Espen Barth Eide-nin mövzunu toparlama baxımından etməli olduğu çıxış vardı. Eide-nin olayların düzəldilməsi lazım olduğunu ifadə etməyə çalışdığı anda o, hirslənərək, 'Söyləyəcək bir şeyim yoxdur" dedi və qapını sərt şəkildə çırparaq, otaqdan çıxdı. Həmin anda başqa edəcək bir şey qalmadı", - deyə qeyd edib.
Akıncı, Cənubi Kipr Respublikası prezidentinin keçmişdə də zaman-zaman bu cür davranışlar sərgilədiyini ifadə edərək, "Buna dözüm göstərmək, səbrli olmaq mümkün deyildi. Bu kimi iclaslarda hər kəs bir-birinə hörmət etməlidir. Əgər bu olmayacaqsa, hər hansı irəliləyişdən də söz gedə bilməz", - deyərək sözlərini yekunlaşdırıb.
Xatırladaq ki, tərəflər arasında son olaraq Enosis böhranı çıxmışdı. Şimali Kipr Türk Respublikasının prezidenti Mustafa Akıncı, "Rum məclisinin Enosis-i məktəblərdə oxutmaq qərarı ləğv edilməlidir. Bu mövzuda dövlət başçısı addım atmalıdır, çünki bu qəbul edilə biləcək davranış deyil" demişdi.
Cənubi Kipr məclisi, məktəblərdə 1950-ci ildə qəbul edilən Enosis (Kiprin Yunanıstana birləşdirilməsi) qərarının qeyd olunması istiqamətində qərar vermişdi. Enosis, adada yunanların türklərə hücumlarına səbəb olmuş və qarşıdurmalar yaratmışdı.
Tərəflər arasında 9 yanvardan başlayaraq mövzu ilə bağlı həll yolları axtarılırdı.