“Aztelekom”un sabiq baş direktoru karserə salınıb”

“Aztelekom” MMC-nin həbsdə olan sabiq baş direktoru Məhəmməd Məmmədov cərimə kamerasına (“karser”) salınıb.
Bu barədə onun vəkili Şahin Rəfiyev məlumat verib.
Vəkil bildirib ki, Bakı İstintaq Təcridxanasda saxlanılan sabiq rəisin hansı səbəbdən cərimə kamerasına salınması barədə açıqlama açıqlanmayıb: “Biz Məhəmməd Məmmədovun nə səbəbə görə ora salınmasından xəbərsizik. Təcridxana rəhbərliyi də bu haqda bizə məlumat vermir”.
Ş.Rəfiyevin sözlərinə görə, hazırda M.Məmmədovun cinayət işi üzrə ibtidai istintaqı yekunlaşıb. Vəkil cinayət işinin materialı ilə tanış olduqlarını deyib.
Qeyd edək ki, ötən il Baş Prokuror yanında Korrupsiyaya qarşı Mübarizə Baş İdarəsi tərəfindən Rabitə və Yüksək Texnologiyalar Nazirliyi sistemində həyata keçirilmiş yoxlamalar nəticəsində nazirliyin “Aztelekom” MMC-nin baş direktoru M.Məmmədov saxlanılıb. Daha sonra məhkəmə onun barəsində həbs qətimkan tədbirinin seçilməsi barədə qərar verib.
M.Məmmədov Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham olunur.